Kryeministri Dimitar Kovaçevski sot në mëngjes sipas kohës lokale në Nju Jork do të marrë pjesë në hapjen e Asamblesë së Përgjithshme të Kombeve të Bashkuara.

Siç bën të ditur shërbimi për shtyp i qeverisë, kryeministrat dhe krerët e shteteve do të priten nga Sekretari i Përgjithshëm i Kombeve të Bashkuara, Antonio Guterres. Kështu nis debati i përgjithshëm i Asamblesë së Përgjithshme të 77-të të Kombeve të Bashkuara.

Sesioni i sivjetshëm i Asamblesë së Përgjithshme të OKB-së është me temën “Zgjidhjet transformuese ndaj sfidave të ndërthurura”, në kuadër të Asamblesë së 77-të të Përgjithshme e cila ka në fokus temën: “Zgjidhjet përmes solidaritetit, qëndrueshmërisë dhe shkencës”.

Në orët e pasdites me orën lokale në Nju Jork, kryeministri Kovacevski, së bashku me kolegët e tjerë nga Ballkani Perëndimor, do të marrin pjesë në një drekë pune, të organizuar nga përfaqësuesi i lartë i Bashkimit Evropian për politikë të jashtme dhe siguri dhe zv. presidenti i Komisionit Evropian, Josep Borel.