Presidenti i Afrikës së Jugut Cyril Ramaphosa ka informuar homologun e tij kinez Xi Jinping për misionin e ardhshëm të ndërmjetësimit të gjashtë liderëve afrikanë në Rusi dhe Ukrainë, njoftoi sot presidenca e Afrikës së Jugut.

Në maj, Ramaphosa tha se presidentët e Rusisë dhe Ukrainës, Vladimir Putin dhe Volodymyr Zelensky, kishin rënë dakord për të pritur misionin paqeruajtës. Ai delegacion është gati të vizitojë të dy vendet në mes të qershorit.

Siç tha presidenca e Afrikës së Jugut, Xi përshëndeti "iniciativën e kontinentit afrikan dhe njohu ndikimin që konflikti në Ukrainë ka në jetën e njerëzve dhe sigurinë ushqimore në Afrikë".

Vendet afrikane janë goditur rëndë nga rritja e çmimeve të grurit që nga fillimi i pushtimit rus të Ukrainës, një eksportues kryesor i grurit dhe produkteve të tjera bujqësore. Afrika është gjithashtu e prekur nga ndikimi më i gjerë i luftës në tregtinë botërore.

Delegacioni afrikan do të përfshijë presidentët e Kongos-Brazzaville (Republika e Kongos), Egjiptit, Senegalit, Afrikës së Jugut, Ugandës dhe Zambisë.

Misioni ndërmjetësues dhe paqeruajtës vjen ndërsa Afrika e Jugut përpiqet të mbrohet kundër akuzave se, megjithë neutralitetin e deklaruar në konfliktin me Ukrainën, ajo është në anën e Rusisë.