Pakoja e re e sanksioneve kundër Rusisë, e cila po përgatitet nga Bashkimi Evropian, nuk përfshin përjashtim-derogim për Ballkanin Perëndimor, për shkak të qëndrimit të Beogradit ndaj Moskës zyrtare, raporton Radio Evropa e Lirë (RSE).

-Serbia nuk vendos sanksione ndaj Rusisë, ndaj nuk duhet të ketë përfitim nga derogimi. Me këtë qëndrim u pajtuan edhe vendet e tjera anëtare, tha një burim diplomatik anonim i cili ishte i përfshirë në diskutimet për paketën e re të sanksioneve, transmeton RFE.

Në draftin e parë të propozimit për paketën e re të sanksioneve, Ballkani Perëndimor ishte i përjashtuar nga kufizimet lidhur me importin e naftës bruto ruse.

Në propozimin e mëparshëm thuhej se është e nevojshme të parashikohet një derogim për Ballkanin Perëndimor, për të mbrojtur sigurinë energjetike të rajonit.

Derogimi, sipas idesë paraprake, do të lejonte kalimin e naftës bruto ruse përmes tubacionit kroat të naftës (JANAF), me kusht që një tranzit i tillë të mbetet brenda kufijve të niveleve mesatare të tranzitit të viteve të mëparshme për të shmangur anashkalimin e sanksioneve.

Megjithatë, sipas burimeve diplomatike, pas diskutimeve në nivel të ambasadorëve të vendeve anëtare të BE-së, paragrafi i përjashtimit është hequr për shkak të mosrespektimit të sanksioneve të BE-së ndaj Rusisë nga Serbia, të cilat janë marrëveshje për agresionin rus ndaj Ukrainës.

Radio Evropa e Lirë ka pasur një pasqyrë të dokumentit të fundit, teksti i të cilit është rënë dakord të martën, më 4 tetor, ku nuk përmendet më ndonjë derogim për rajonin.

Burime diplomatike konfirmuan se ekspertët evropianë, pas një analize të thelluar, arritën në përfundimin se importet e naftës janë mjaft të larmishme, prandaj përjashtimi nuk është i nevojshëm sepse "nuk është më e nevojshme të blihet naftë ruse". Duke marrë parasysh këtë fakt si dhe kundërshtimin e disa shteteve anëtare, Komisioni Evropian e hoqi atë pikë nga propozimi i tij.

Më parë, Serbia ishte përjashtuar nga sanksionet sepse Komisioni Evropian gjeti një zgjidhje për të ruajtur importet e naftës në Serbi, përmes Gazsjellësit Adriatik (JANAF).

Më 4 tetor, ambasadorët e BE-së arritën një marrëveshje kornizë për paketën e tetë të sanksioneve kundër Rusisë. Paketa e fundit përfshin gjithashtu një kapak për çmimin e naftës ruse.