Komisioni për shqyrtimin e procedurave për dhënien e lejeve të armëve konstatoi se mbi 5.000 çështje nuk janë proceduar dhe disa janë vendosur në kundërshtim me ligjin. Për këtë, Departamenti i Kontrollit të Brendshëm ka propozuar procedura disiplinore, përfshirë edhe shkarkime, për rreth 15 zyrtarë të lartë të policisë nga qeveria e kaluar, informoi ministri i Punëve të Brendshme, Pançe Toshkovski.

Ai në një intervistë për “Sitel” ka thënë se në të kaluarën armë u jepeshin personave që nuk kishin të drejtë t’i posedonin, ndërsa të tjerët që kishin të drejtë nuk e përfundonin procedurën. Ai paralajmëroi edhe dixhitalizimin e procesit për dhënien e këtyre lejeve.

“Sipas udhëzimit të prokurorit publik kundër atyre për të cilët janë përcaktuar elemente të veprës penale do të ngrihet kallëzim penal. "Këta persona janë shkarkuar dhe do të vijojë procedura penale," tha Toshkovski.

Ministri paralajmëroi edhe një ligj të ri për armëmbajtjen, i harmonizuar me legjislacionin e BE-së, i cili do të bazohet në një analizë të plotë dhe zgjidhje sistematike në interes të qytetarëve.

Në pyetjen për sigurinë në vend, Toshkovski siguroi se Ministria e Punëve të Brendshme dhe institucionet tjera janë të gatshme të merren me të gjitha kërcënimet e mundshme të sigurisë.