Një juri e madhe e Manhattanit mbrëmë paditi ish-presidentin Donald Trump për pagesën e fondeve për fushatën e aktores pornografike Stormy Daniels për të mbajtur të heshtur se ajo kishte një lidhje me të.

Kjo është hera e parë në historinë e SHBA-së që një ish-president akuzohet për një krim.

Trump ka konfirmuar për disa media se do të dorëzohet vullnetarisht në stacionin e policisë në Manhattan të martën e javës së ardhshme. Sipas procedurës ai duhet të ndalohet, t'i merren shenjat e gishtave dhe të fotografohet për një foto policie si të gjithë të arrestuarit. Më pas, i prangosur, ai duhet të dalë para një gjyqtari dhe të deklarojë nëse ndihet fajtor apo jo.

Akuza është për vepër penale të padhunshme, ndaj pritet që ai të lirohet pa kusht. Megjithatë, rasti është unik, pasi si ish-president, Trump do të shoqërohet nga Shërbimi Sekret, ndaj nuk dihet nëse do të vihet në pranga.

Gazetarë nga Shtetet e Bashkuara dhe e gjithë bota janë ende duke u mbledhur para gjykatës së Nju Jorkut për të raportuar mbi këtë ngjarje të paprecedentë në historinë amerikane.

Detajet e aktakuzës, e cila vjen pas një hetimi disa mujor nga Prokurori i Qarkut të Manhattan, demokrat, Alvin Bragg, nuk janë bërë ende të ditura. Vëzhguesit besojnë se kjo mund të ndikojë në planet e Trump për të kandiduar për president. Ai më herët ka deklaruar se nuk do të heqë dorë nga fushata edhe nëse ndaj tij ngrihen akuza, pasi ka mohuar çdo faj. Ai premton të bëjë një spektakël nga e gjithë kjo. Javën e kaluar ai hodhi një bombë në opinion se do të arrestohet nga policia dhe se për këtë gjoja po përgatiten protesta të dhunshme, ndërkohë që po mbledh intensivisht mjete për fushatën e tij nga mbështetësit.

Ish-avokati i Trump, Michael Cohen, dëshmoi para Kongresit në vitin 2019 se ai ishte udhëzuar nga Trump të paguante fondet e marra nga arkat e fushatës në këmbim të heshtjes së Daniels dhe një gruaje tjetër, Karen McDougal. Ndodhi pak ditë para zgjedhjeve presidenciale të vitit 2016, kur Trump fitoi kundër kundërshtares, demokrates Hillary Clinton.

Prokurorët federalë filluan të shqyrtojnë çështjen Daniels në vitin 2018, pas së cilës Cohen u akuzua dhe u dënua me burg, por Trump iu shmang ndjekjes penale në atë kohë.

Aktakuza e një ish-presidenti është “skandaloze”, kështu e ka cilësuar këtë akt Mike Pence, i cili ka shërbyer si zëvendëspresident i Trump.

Në një intervistë për CNN, ai tregoi se çështja ishte e dobët dhe mund të pushohej nga gjyqtari. Dhe republikanë të tjerë mbajtën anën e Trump dhe komentuan se kjo është një "gjueti politike shtrigash" kundër një ish-presidenti republikan dhe një përpjekje nga "e majta radikale" për të përçarë kombin.