Kanë filluar referendumet për aneksimin e katër rajoneve të Ukrainës në Rusi
Autoritetet në katër territore ukrainase, të krijuara nga Rusia dhe të kontrolluara nga Moska, kanë filluar të mbajnë të ashtuquajturat referendume për bashkimin me Rusinë. Udhëheqësit e instaluar nga Kremlini në Lugansk, Donetsk, Kherson dhe Zaporizhia kanë thënë se planifikojnë të mbajnë një votim për bashkimin me Rusinë deri më 27 shtator. Ukraina dhe Perëndimi kanë deklaruar se nuk do t'i njohin këto referendume si legjitime.
Moska dëshiron të aneksojë rajonet e Ukrainës përmes këtij procesi. Ekspertët e cilësojnë referendumin rus në territorin e Ukrainës si të rremë dhe qesharak.
“Ne u japim të drejtën e votës të gjithë qytetarëve të Republikës Popullore të Donetskut që ndodhen në territorin tonë, si dhe jashtë vendit. Qendrat e votimit për referendumin janë të hapura”, tha Vladimir Vysocki, presidenti i komisionit zgjedhor.
Paralelisht me fillimin e votimit në rajonet separatiste, mijëra mbështetës të presidentit rus Vladimir Putin dolën në rrugë në Moskë për të shprehur mbështetjen për aneksimin e zonave të Ukrainës lindore në Rusi.
Pjesëmarrësit e tubimit masiv mbanin flamuj rusë, pankarta me simbolin "Z" dhe "Rusët, ukrainasit, një komb, një shtet".