Vdiq karikaturisti dhe kuratori Lazo Plavevski
Pas një sëmundjeje të shkurtër, ka vdekur në moshën 68-vjeçare karikaturisti, historiani i artit, kuratori dhe kritiku i artit Lazo Plavevski, njoftoi Muzeu i Artit Bashkëkohor.
I lindur në vitin 1954 në Shkup, Plavevski la një trashëgimi të rëndësishme krijuese gjatë mbi katër dekadave të veprimtarisë së tij profesionale dhe deri në pensionimin e tij në vitin 2021, ai punoi si kurator-këshilltar në Muzeun e Qytetit të Shkupit.
Si kurator, Plavevski ka organizuar një numër të madh ekspozitash individuale dhe grupore të autorëve bashkëkohorë maqedonas, ka qenë bashkëpunëtor i rregullt i revistës për artet pamore "Golemoto kasle" dhe autor i shumë teksteve dhe recensioneve për artin bashkëkohor maqedonas.
Me botimin e karikaturave filloi në vitin 1970, ndërsa në vitin 1976 mori çmimin Grand Prix të Galerisë Botërore të Karikaturave në Shkup. Ka botuar librat “Nema kniga/karikatura 1990-1993” dhe “Karta” (së bashku me Miroslav Gërçevin).
Më 16 prill të vitit të kaluar, në MSU u hap ekspozita e tij vetjake “Në akull të hollë”, ku u prezantuan rreth 200 printime origjinale dhe dixhitale të karikaturave, të cilat i publikon në faqen “Okno” që nga viti 2015.