Nje nga ish-komandantët e grupit mercenar rus "Wagner", i cili iku në Norvegji, në një intervistë me Reuters tha se donte të kërkonte falje për pjesëmarrjen në luftimet në Ukrainë, duke shtuar se ai po fliste për të ndihmuar në sjelljen e autorëve të krimit para drejtësisë.

Andrei Medvedev, i cili kaloi kufirin ruso-norvegjez më 13 janar, thotë se ishte dëshmitar i vrasjes dhe abuzimit të të burgosurve rusë që luftuan kundër ukrainasve në radhët e Wagner.

Ai pretendon se ka kaluar kufirin duke u ngjitur mbi telat me gjemba dhe duke shmangur kështu patrullat kufitare. Ai pretendon se dëgjoi të shtëna nga rojet kufitare teksa vraponte nëpër pyll dhe përtej lumit të ngrirë në kufirin ruso-norvegjez.

26-vjeçari Medvedev tani po kërkon azil në Norvegji.

“Shumë më konsiderojnë si bastard, kriminel dhe vrasës. Së pari, dua t'u kërkoj falje ukrainasve. Edhe pse nuk e di se si do të merret, dua të them se më vjen keq”, tha ai për Reuters.