Sekretari amerikan i Shtetit Anthony Blinken kritikoi sot ministrin e Jashtëm rus Sergej Lavrov, duke e akuzuar atë për një "cunam të dezinformimit" dhe Moskën për përshkallëzim në Ukrainë.

Në një takim të Organizatës për Siguri dhe Bashkëpunim në Evropë (OSBE), Blinken tha se i vinte keq që Lavrov u largua nga salla pas fjalimit të tij.

Më vjen keq që kolegu ynë, zoti Lavrov, doli nga salla, duke mos treguar mirësjellje të na dëgjojë ashtu siç e dëgjuam ne, tha Blinken në takimin në Maltë.

Ai shtoi se Sergej Lavrov është shumë i aftë për të përmbytur dëgjuesit me një "cunam të keqinformimit".

Më parë, kreu i diplomacisë ruse akuzoi Perëndimin për orkestrimin e një "lufte të re të ftohtë", e cila, siç vlerësoi ai, kërcënon të kalojë në një "fazë të nxehtë".

Sergej Lavrov ndodhet sot në Maltë, në vizitën e tij të parë në një vend të Bashkimit Evropian (BE) që nga fillimi i luftës në Ukrainë në vitin 2022.

Ministri i Jashtëm i Rusisë, i cili është nën sanksionet e BE-së, nuk e ka vizituar Bashkimin që nga vizita në Stokholm në dhjetor 2021, gjithashtu për një takim të OSBE-së.