Petkoviq: Në Bruksel do të diskutojmë zbatimin e marrëveshjes së Ohrit, me “vija të kuqe” të qarta
Drejtori i Zyrës së Qeverisë së Serbisë për Kosovën, Petar Petkoviq, deklaroi sot se në vazhdimin e dialogut ndërmjet Beogradit dhe Prishtinës do të diskutohen hapat konkretë për zbatimin e marrëveshjes së Ohrit.
Takimi i shefave të ekipeve negociatore të Beogradit dhe Prishtinës, Petar Petkoviq dhe Besnik Bislimi, është caktuar për më 4 prill në Bruksel.
Petkoviq tha për Radio Beogradin se do të ketë vazhdim të dialogut në nivel teknik dhe se do të diskutohen hapat konkretë për zbatimin e marrëveshjes së Ohrit, së bashku me "vijat e kuqe" të qarta, transmeton Beta.
“Vijat tona të kuqe janë se Beogradi nuk do të pajtohet kurrë që e ashtuquajtura Kosovë të bëhet anëtare e OKB-së dhe se Beogradi as de fakto dhe as de jure nuk do ta njohë të ashtuquajturën Kosovë. Mund të diskutojmë dhe të shohim për gjithçka tjetër që është rënë dakord në Aneks, se si do ta zbatojmë atë”, tha Petkoviq.
Ai shtoi se në tekstin e aneksit për zbatimin e Marrëveshjes për rrugën drejt normalizimit të marrëdhënieve ndërmjet Serbisë dhe Kosovës, ndër gjërat e para që duhet të përmbushen është obligimi i Prishtinës për të formuar një Bashkësi të Komunave Serbe dhe se është e qartë se duhet të zbatohet në përputhje me marrëveshjet përkatëse paraprake nga dialogu.
Sipas tij, kompetencat thelbësore të ZSO-së, objektivat, organet dhe mënyra se si funksionon janë të përcaktuara qartë, duke përfshirë pikën 16, e cila përcakton se Beogradi financon ZSO-në.