President Stevo Pendarovski lidhur me vendimin e Gjykatës Kushtetuese, me të cilin shfuqizohen dispozitat e Ligjit për paga dhe kompensime të tjera të personave të zgjedhur dhe të emëruar në Republikën e Maqedonisë, i bëri thirrje Qeverisë që të gjejë zgjidhje ligjore që do ta rregullojë çështjen me uljen e pikëve. .

“Mendoj se është e papëlqyeshme rritja e pagave që paguhen nga buxheti i shtetit në kohë krize ekonomike”, tha Pendarovski.

Me vendimin e Gjykatës Kushtetuese për shfuqizimin e dy neneve të ligjit për pagat dhe shtesat e zyrtarëve, bëhet e mundur rritja e pagave të zyrtarëve shtetërorë deri në 78 për qind. Gjyqtarët kushtetues, në fakt, kanë vendosur edhe vetë, sepse edhe ata bëjnë pjesë në grupin e funksionarëve që kanë mundësi ligjore të “nderohen” me një pagë gati dyfish më të lartë se ajo aktuale.

Përveç tyre, ligji vlen edhe për të ardhurat e kryeministrit, presidentit, kryetarit të Kuvendit, por edhe të gjithë bartësve të funksioneve publike, sipas Unionit të Administratës, Autoriteteve Gjyqësore dhe Shoqatave të Qytetarëve (UPOZ). Këtu përfshihen të gjithë zëvendësministrat, kryetarët e bashkive, drejtorët në kompanitë dhe agjencitë shtetërore.