Pendarovski dhe Bekteshi vendosën lule në vendin e aksidentit të autobusit në autostradën "Struma".
Kryetari i shtetit Stevo Pendarovski sot pasdite vendosi lule në autostradën "Struma" në Bullgari, në vendin ku humbën jetën 45 shtetas të Maqedonisë në aksidentin me autobus në nëntor të vitit të kaluar.
- Nderim për 45 shtetas të Maqedonisë që humbën jetën tragjikisht në aksidentin e tmerrshëm të autobusit më 23 nëntor 2021. Në autostradën “Struma” në Bullgarinë fqinje vendosa lule në vendin e aksidentit të autobusit, ka shkruar Pendarovski në profilin e tij në Facebook.
Së bashku me kreun e shtetit, në vendngjarje ka vendosur lule edhe ministri i Ekonomisë, Kreshnik Bekteshi.
Pasagjerët që humbën jetën në aksidentin e 23 nëntorit 2021 po ktheheshin nga Stambolli në Shkup me autobusin “Besa Trans”.
Presidenti Pendarovski sot ishte në Sofje për shënimin e fillimit të punimeve të interkonjeksionit të gazit Greqi-Bullgari.