Pavel beson se Ukraina duhet të anëtarësohet në NATO sapo të përfundojë lufta
Presidenti i sapozgjedhur i Republikës Çeke, Petr Pavel, tha sot se Ukraina duhet të lejohet të anëtarësohet në NATO "sapo të përfundojë lufta".
Pavel, një gjeneral në pension i NATO-s, i tha BBC-së se Ukraina do të ishte "moralisht dhe praktikisht e gatshme" për t'u bashkuar me aleancën kur të përfundojë konflikti.
Në intervistën e tij të parë me mediat e huaja si president, Pavel mbrojti me vendosmëri mbështetjen ushtarake perëndimore për Kievin, duke thënë se nuk duhet të ketë "pothuajse asnjë kufizim" në dërgesat.
Ai shtoi se dërgimi i avionëve luftarakë perëndimor F-16 "nuk ishte një tabu" për të, por se ai nuk ishte i sigurt që ato mund të dorëzoheshin në një kohë që do t'i përshtatej Kievit.
Presidenti i SHBA Joe Biden ka përjashtuar mundësinë e dërgimit të F-16 këtë javë, megjithëse presidenti francez Emmanuel Macron tha se asgjë nuk ishte përjashtuar.
"Jam krenar që vendi im ishte një nga të parët që dha ndihmë të konsiderueshme ushtarake për Ukrainën", tha Pavel për BBC.
Ai përshëndeti vendosjen e tankeve perëndimore në Ukrainë, por shtoi se ai besonte se "ende nuk mjafton" për t'iu kundërvënë Rusisë. s