Zgjedhjet parlamentare në Letoni
Letonezët votojnë sot në zgjedhjet parlamentare në kushtet e pushtimit rus të Ukrainës, ndaj analistët vlerësojnë se në krye të qeverisë do të mbetet kryeministri centrist Kristianis Karins, shkruan gazeta franceze Figaro.
Ekspertët e shpjegojnë përfundimin e tyre me dobësimin e populistëve, konservatorëve dhe Partisë Socialdemokrate "Soglasnost" (afër minoritetit rusishtfolës), ndërsa partia properëndimore e Karinsh "Uniteti i Ri" kryeson në sondazhet parazgjedhore me rreth 13 për qind.
Dy ditë para votimit, presidenti Egils Levits u bëri thirrje qytetarëve të vendit baltik, anëtar i BE-së dhe NATO-s, të votojnë. Megjithatë, ai lëshoi një paralajmërim në lidhje me partitë pro-Kremlinit, të afërta me pakicën e rëndësishme rusisht-folëse, e cila "në fillim të pushtimit rus të Ukrainës, hezitoi të deklaronte qartë se kush ishte agresori dhe kush ishte viktima".
Pa i përmendur ato, ai kritikoi partitë populiste në deklaratën e tij që "propozojnë zgjidhje të thjeshta dhe shpesh jopraktike për problemet jashtëzakonisht komplekse, që premtojnë të shkurtojnë të gjitha shpenzimet dhe të rrisin të gjithë ndihmën nga sot në nesër", duke përmendur veçanërisht çmimet e energjisë.
Qendrat e votimit u hapën në orën 07:00 me orën lokale (04:00 GMT) dhe do të mbyllen në orën 20:00 (17:00 GMT). Pak minuta më vonë pritet të publikohen të dhënat e para nga exit poll-et.