Papa Françesku në fjalën e sotme drejtuar besimtarëve, ai u bëri thirrje të gjithë të krishterëve që të marrin pjesë në një lutje të përbashkët në sheshin “Shën Pjetri” në Vatikan, që do të mbahet në shtator.

Më 30 shtator do të mbahet lutja ekumenike, raportojnë agjencitë botërore.

- Ftoj vëllezër e motra nga të gjitha besimet e krishtera të marrin pjesë në këtë tubim të popullit të Zotit, tha Papa Françesku.

Ai theksoi se Zoti “e udhëheq popullin e tij me përkushtim dhe durim drejt bashkimit të plotë” të besimtarëve të krishterë.

Këtë muaj Papa do të mbajë një meshë të veçantë në Bazilikën e Shën Pjetrit, në kuadër të lutjes javore për bashkimin e të krishterëve, e cila do të mbahet këtë vit nga 18 deri më 25 janar.

Ekumenizmi është një përpjekje moderne për pajtimin, bashkëpunimin, afrimin dhe bashkimin e kishave të krishtera dhe fillimet e tij lidhen me kishat protestante në shekullin e 19-të.

Vatikani u hap pjesërisht ndaj idesë së ekumenizmit pas Koncilit të Dytë të Vatikanit, i cili u mbajt midis 1962 dhe 1965.