Një gjykatë indiane e shpalli sot fajtor liderin e opozitës Rahul Gandhi për shpifje dhe e dënoi me dy vjet burg për një fjalim që mbajti në vitin 2019, në të cilin ai e quajti kryeministrin Modi një "hajdut". Gandhi, një udhëheqës i lartë i Kongresit dhe pasardhës i dinastisë politike Nehru-Gandhi, do të apelojë vendimin në një gjykatë më të lartë, tha partia e tij.

Vendimi u dha nga një gjykatë në qytetin Surat, i cili ndodhet në Gujarat, shteti i origjinës së kryeministrit Narendra Modi. Këshilltari i qeverisë federale Kanchan Gupta tha se Gandhi, një anëtar i Dhomës së Ulët të Parlamentit, mund të përballet me skualifikim të menjëhershëm si anëtar i parlamentit pas vendimit.

“Gjykata e gjen komentin e Rahul Gandhit si shpifës. Ai është dënuar me dy vjet burg”, tha Ketan Reshamwala, një avokat i paditësit Purnesh Modi, një ligjvënës nga Partia Bharatiya Janata (BJP) e kryeministrit Modi. Gandhi ishte i pranishëm para gjykatës në Surat dhe iu dha menjëherë lirimi me kusht dhe dënimi i tij u pezullua për një muaj.

Në një fjalim përpara zgjedhjeve të fundit të përgjithshme në 2019, Gandhi sulmoi kryeministrin dhe dy biznesmenë indianë të arratisur, të dy me mbiemrin Modi, ndërsa flisnin për korrupsion të nivelit të lartë në vend. Gandhi i tha gjykatës të enjten se komenti i tij nuk ishte kundër asnjë komuniteti.

Partia e tij tha se çështja kundër tij ishte ngritur nga qeveria "frikacake dhe diktatoriale" e BJP për "ekspozimin e veprave të tyre të errëta".

Kongresi dikur dominues i Gandit sot kontrollon më pak se 10 për qind të vendeve në dhomën e ulët të parlamentit dhe ka pësuar humbje të rënda nga BJP në dy zgjedhjet e fundit të përgjithshme. Modi mbetet politikani më popullor i Indisë dhe pritet të fitojë një mandat të tretë në zgjedhjet e ardhshme të përgjithshme në 2024.