Kryetari i BESA-s Bilal Kasami, njoftoi sot se me partinë Alternativa na Afrim Gashi, nënshkruan një deklaratë bashkëpunimi. Nga sot, ka theksuar Kasami, do të promovojmë një front të përbashkët opozitar, përmes të cilit sigurojmë qytetarët se pas 20 vitesh jemi të gatshëm të sjellim një opsion politik që do të funksionojë për interesat e qytetarëve.

“Shqiptarët për 20 vjet janë lodhur nga BDI-ja, nga mospërfaqësimi i tyre, sepse BDI për këto 20 vite përfaqëson interesat e klaneve të tyre dhe interesat e të dashurve të tyre dhe këtë nuk e fshehin më. Është bërë ekskluzivitet punësimi i pozitave të rëndësishme të njerëzve të afërt me njerëzit kryesorë të BDI-së, nuk ka vend që qytetarët e tjerë të fitojnë bukën e gojës nga BDI”, tha Kasami.

Si BESA ashtu edhe Alternativa do të insistojnë në fshirjen e termit “20%”.

“Ne nënshkruam një deklaratë bashkëpunimi me Alternativën për një qasje të përbashkët në zgjedhjet e ardhshme parlamentare. Në atë pjesë jemi edhe në fazën e harmonizimit të qëndrimeve tona. BESA dhe Alternativa nuk janë kundër ndryshimeve kushtetuese, por ne insistojmë që kur të hapet kushtetuta të zgjidhet një çështje më e rëndësishme, që është përcaktimi i gjuhës shqipe si 20%. Me këtë vlerësojmë se do të afrohemi edhe më shumë me BE-në”, tha kryetari i BESA-s, Bilal Kasami.