Operacioni “Ninja Turtle” i policisë zvicerane: Arrestohen mbi 2 mijë pedofilë
Më shumë se 2.200 pedofilë janë ekspozuar në mbarë botën gjatë viteve falë Operacionit Ninja Turtle. Policia zvicerane njoftoi dje se kishte nisur fshehurazi operacionin e internetit në vitin 2012.
Policia më pas mori informacionin se një person që jetonte në kantonin Aargau kishte shpërndarë "material ilegal pornografik" me pseudonimin "Breshkë Ninja" përmes platformës GigaTribe, e cila mundëson shkëmbimin anonim të të dhënave.
Po atë vit, hetimet çuan në arrestimin e burrit pas pseudonimit "Breshkë Ninja". Bëhet fjalë për një 62-vjeçar gjerman i dënuar në vitin 2015, thuhet në njoftimin e policisë kantonale të Aargaut.
Policia zvicerane më pas vendosi të përdorte profilin e tij për të ekspozuar pedofilë të tjerë.
"Një operacion i fshehtë i kryer në internet për disa vite ka përfunduar me sukses," më shumë se 2.200 pedofilë janë ekspozuar, tha policia në Aargau.
Arrestimet u kryen në Zvicër, Kroaci, Brazil, Francë, Peru, Rumani dhe Spanjë, thuhet në deklaratë.