OKB-ja e shqetësuar për krizën ushqimore në Sri Lanka

Kriza e Sri Lankës / Foto EPA-EFE / CHAMILA KARUNARATHNE

Programi Botëror i Ushqimit i OKB-së (WFP) ka shprehur shqetësim për ndikimin e krizës ekonomike në Sri Lanka në furnizimin me ushqim për më të varfërit në vend, raportoi DPA.

Gati 6,3 milion njerëz - ose tre në 10 familje - janë në rrezik të pasigurisë ushqimore dhe kanë nevojë për ndihmë, tha WFP në një deklaratë, duke falënderuar kontributin e Norvegjisë prej rreth 500.000 dollarë amerikanë.

Sondazhet e fundit të WFP-së tregojnë se 61 për qind e familjeve ose hanë më pak, hanë më pak ushqime të ushqyeshme, apo edhe anashkalojnë vaktet fare, për shkak të krizës akute, thuhet në raport.

Një program urgjence është duke u krijuar për të ndihmuar 3,4 milionë njerëzit në Sri Lanka më të rrezikuar nga pasiguria ushqimore dhe kequshqyerja, shtoi ai.

Kombi ishull, në jug të Indisë, me një popullsi prej rreth 22 milionë banorësh, është në krizën më të madhe ekonomike në dekadat e fundit.

Kohët e fundit, vendit, i cili ka 51 miliardë dollarë borxh të jashtëm, i ka mbetur pa para për të importuar mallra thelbësore si karburant, ilaçe dhe gaz gatimi.

Çmimet e ushqimeve janë rritur ndjeshëm dhe inflacioni tashmë është mbi 60 për qind, tregojnë shifrat zyrtare.

Video e ditës