OKB: Më shumë se 140 punëtorë humanitarë u vranë në mbarë botën vitin e kaluar
Më shumë se 140 punëtorë humanitarë janë vrarë në vitin 2021, tha sot Zyra e OKB-së për Koordinimin e Çështjeve Humanitare me seli në Gjenevë.
Numri i punëtorëve humanitar të vrarë gjatë një konflikti ose si rezultat i një sulmi është më i larti që nga viti 2013, sqaron në një deklaratë organizata që koordinon aktivitetet humanitare në rast të krizave humanitare globale.
Shumica e të vrarëve u qëlluan, ndërsa shkaku i dytë më i zakonshëm i vdekjeve është si rezultat i sulmeve ajrore apo granatimeve, kryesisht në Siri.
Vitin e kaluar, 203 punëtorë humanitarë u plagosën dhe 117 u rrëmbyen.
Për sa i përket vitit aktual kalendarik, që nga janari janë regjistruar 168 sulme ndaj punonjësve të ndihmës, ku 44 prej tyre janë vrarë.
"Nevojat humanitare janë më të mëdha se kurrë dhe punonjësit e ndihmës po punojnë në një mjedis edhe më të rrezikshëm," tha nënsekretari i përgjithshëm i OKB-së për Çështjet Humanitare, Martin Griffiths.
Vendet më të rrezikshme për punëtorët humanitar janë Sudani i Jugut, Afganistani dhe Siria, sipas Zyrës së OKB-së për Koordinimin e Çështjeve Humanitare.
“Më shumë njerëz në mbarë botën kanë nevojë për ndihmë humanitare se kurrë më parë, dhe 300 milionë prej tyre jetojnë në rajone të krizës”, tha zëdhënësi i agjencisë, Jens Lerke. Megjithëse donatorët po ofrojnë më shumë ndihmë se kurrë më parë, nevojat po rriten çdo ditë, shtoi ai.