OKB-ja ka dënuar sulmin ndaj parlamentit libian në Tobruk nga protestuesit
Kombet e Bashkuara dënuan sot ndërhyrjen e protestuesve në selinë e Parlamentit libian në Tobruk.
“E drejta e popullit për protestë paqësore duhet të respektohet dhe të mbrohet, por trazirat dhe vandalizmi, siç është bastisja e djeshme në selinë e Dhomës së Përfaqësuesve në Tobruk, janë krejtësisht të papranueshme”, shkroi në Twitter Stephanie Williams, këshilltarja speciale e OKB-së për Libinë.
Qindra demonstrues protestuan në kryeqytetin Tripoli dhe në qytete të tjera anembanë Libisë. Protestat u shoqëruan me sulme dhe djegie të ndërtesave qeveritare, përfshirë Dhomën e Përfaqësuesve në Tobruk, në lindje të vendit.
Protestat erdhën një ditë pasi udhëheqësit në parlamentin dhe asamblenë e Tripolit nuk arritën një marrëveshje për mbajtjen e zgjedhjeve gjatë bisedimeve të ndërmjetësuara nga OKB në Gjenevë.
Përfaqësuesi i BE-së në Libi, Sabadell Jose, u bëri thirrje protestuesve të "shmangnin çdo formë dhune". Ai tha se demonstratat tregojnë se populli i Libisë dëshiron "ndryshime përmes zgjedhjeve" dhe se "zëri i tyre duhet të dëgjohet".