Kancelari gjerman Olaf Scholz sot kërkoi nga parlamenti që të hënën më 16 dhjetor të votojë për besimin e qeverisë, e cila në rast mosbesimi do të lejojë mbajtjen e zgjedhjeve të parakohshme parlamentare në shkurt.

Nëse Scholz humbet besimin, presidenti Frank-Walter Steinmeier do të vendosë nëse do të shpërndajë Bundestagun. Ai ka 21 ditë kohë për të marrë këtë vendim dhe pas shpërndarjes së parlamentit, zgjedhjet duhet të mbahen brenda 60 ditëve.

Sondazhet tregojnë se partia e Scholz-it mbetet prapa bllokut kryesor opozitar të qendrës së djathtë të Friedrich Merz-it. Zëvendës-kancelari Robert Habeck, të Gjelbërit e të cilit janë më prapa, po konkurron gjithashtu për postin e lartë të kancelarit. Alternativa e ekstremit të djathtë për Gjermaninë, e cila po forcohet sipas sondazheve, ka propozuar Alice Weidel si kandidate për kancelare, por pothuajse nuk ka asnjë shans për sukses, pasi të gjitha partitë e tjera refuzojnë të bashkëpunojnë me të.

Gjermania nuk ka mbajtur një votëbesimi të qeverisë që nga viti 2005, kur kancelari i atëhershëm Gerhard Schröder humbi besimin, duke çuar në zgjedhje të parakohshme, të fituara ngushtë nga Angela Merkel.