Prokuroria themelore publike në Koçan do të zhvillojë procedurë hetimore ndaj një 24-vjeçari për të cilin ekziston dyshimi i bazuar se ka kryer veprën penale të vrasjes në tentativë.

 Më 13 shtator, në mbrëmje, i dyshuari është pajtuar me viktimën që të takohen në parkingun afër Monumentit të Lirisë në Koçan me qëllim të blerjes dhe shitjes së celularit. Kur janë takuar në vendin e caktuar, i dyshuari ka hipur në veturën e viktimës, është ulur në sediljen e pasagjerit dhe ka filluar të flasë me të dhe të shikojë celularin e tij. Pas një kohe të shkurtër, ai ka nxjerrë një thikë nga xhepi dhe e ka goditur në një pjesë vitale të trupit në zonën e kokës dhe qafës poshtë mjekrës, duke i shkaktuar një plagë të hapur rreth 2-3 cm. Thika është thyer dhe i dyshuari ka vazhduar ta godasë viktimën edhe disa herë me dorezë. I sulmuari ia kapi dorën dhe e ndaloi, pas së cilës i dyshuari doli nga vetura dhe u largua nga vendi i ngjarjes, njofton Prokuroria Publike e shtetit.

Nga aty shtojnë se për shkak të rrezikut të arratisjes, mundësisë së ndikimit te dëshmitarët dhe pengimit të procedurës penale, por edhe kërcënimit real për përsëritjen apo përfundimin e tentativës së veprës penale, prokurori publik i ka paraqitur propozim gjyqtarit të procedurës paraprake. nga Gjykata Themelore në Koçan duke caktuar masën e paraburgimit. Gjykata e pranoi propozimin në themel dhe i caktoi të dyshuarit masën e paraburgimit prej 30 ditësh.