Autoritetet e reja në Siri thanë sot se do të "ngrijnë Kushtetutën dhe Parlamentin" gjatë një periudhe tranzicioni tre-mujore, pas rrëzimit të liderit shumëvjeçar Bashar al-Assad.

Zëdhënësi për çështjet politike të qeverisë së re siriane, Obaida Arnaut, i tha AFP se do të krijohej një komitet i drejtësisë dhe të drejtave të njeriut për të studiuar kushtetutën dhe për të bërë ndryshime, raportoi Beta.

Kushtetuta aktuale e Sirisë daton nga viti 2012 dhe nuk thotë në mënyrë eksplicite se Islami është feja shtetërore.

Rebelët e udhëhequr nga islamistët radikalë, të cilët morën pushtetin në Siri të dielën, emëruan Mohamed al-Bashir si kreun e një qeverie kalimtare që do të zgjasë deri më 1 mars 2025. Deri më tani, Bashir udhëhoqi "qeverinë e shpëtimit" në bastionin rebel të Idlib, në Sirinë veriperëndimore.

Zëdhënësi Arnaut tha se të martën është mbajtur një takim mes anëtarëve të "qeverisë së shpëtimit" dhe ish-ministrave të qeverisë së Asadit, lidhur me transferimin e pushtetit.

Prioriteti ynë është të shpëtojmë institucionet dhe t'i mbrojmë ato, tha Arnaut.

Pas një ofensive 11-ditore, një koalicion i grupeve rebele, i udhëhequr nga grupi radikal islamik Hayat Tahrir al-Sham, rrëzoi Assadin të dielën, i cili iku në Rusi me familjen e tij.

Arnaut tha se autoritetet e reja duan të krijojnë një "shtet të së drejtës" pas më shumë se gjysmë shekulli sundimi nga familja Assad, i shënuar nga represioni.

Ai shtoi se “të gjithë ata që kanë kryer krime kundër popullit sirian do të gjykohen në përputhje me ligjin”.

I pyetur për liritë fetare dhe personale, ai tha se autoritetet e reja "respektojnë diversitetin fetar dhe kulturor në Siri, i cili do të mbetet ashtu siç është".

Në vendin, ku shumica janë myslimanë sunitë, Assad, një anëtar i pakicës alavite, u paraqit si një mbrojtës i pakicave që kishin frikë se do të viheshin në shënjestër nga autoritetet e reja.