Gjigandi zviceran i ushqimit Nestlé do të rishikojë marrëdhëniet e tij me bankat pas marrjes së Credit Suisse nga UBS, tha sot shefi ekzekutiv Mark Schneider. Nestlé ishte klient i Credit Suisse, tha kreu i grupit më të madh ushqimor në botë, transmeton Hina.

"Ne kemi punuar me Credit Suisse për dekada, ngushtë dhe me besim," tha Schneider, "dhe tani ne duhet të shohim se si të riorganizojmë marrëdhëniet tona me bankat, si zvicerane dhe ndërkombëtare." Ndërhyrja e qeverisë zvicerane, bankës qendrore dhe rregullatorit të tregut financiar gjatë marrjes së Credit Suisse nga UBS stabilizoi situatën dhe riktheu besimin, theksoi njeriu i parë i Nestle.

Duke iu referuar biznesit, ai vuri në dukje se e kanë nisur mirë vitin, duke shtuar se me vazhdimin e rritjes së çmimit, ndoshta do të neutralizojnë rritjen e çmimit të lëndëve të para. Nestlé rriti çmimet me 8,2 përqind vitin e kaluar, por kjo nuk kompenson plotësisht kostot më të larta të inputeve.