Balerina Michaela de Prince vdiq në moshën 29-vjeçare, duke e lënë botën e artit në zi. Lajmi për vdekjen e saj të papritur është bërë i ditur në rrjetin social Instagram, ndërsa shkaku nuk bëhet i ditur.

De Prince ka lindur në Sierra Leone dhe kaloi vite duke kërcyer me Baletin Kombëtar në Amsterdam. Në mesazhin e publikuar nga ekipi i saj, theksohet se me artin e saj preku shumë zemra, frymëzoi shumë dhe la gjurmë të pashlyeshme në botën e baletit dhe më gjerë.

“Me zemër të rëndë ndajmë lajmin për vdekjen e balerinës së yllit Michaela Mebinty de Prince, e cila preku shumë zemra me artin e saj, frymëzoi shumë dhe la gjurmë të pashlyeshme në botën e baletit dhe më gjerë”, thuhet në mesazh. .

Michaela de Prince kaloi një fëmijëri të vështirë, ajo humbi prindërit e saj në moshë të vogël dhe përfundoi në një jetimore ku u dhunua. Në vetëm katër vjeç, ajo u adoptua nga një çift amerikan që e mbështetën për të realizuar ëndrrën e saj për t'u bërë balerinë. Edhe pse i thanë se nuk kishte llojin e duhur të trupit dhe ngjyrën e lëkurës për të qenë balerinë, de Prince nuk u dorëzua.

Në moshën 17-vjeçare, Michaela shkoi në Evropë dhe u bashkua me Baletin Kombëtar në Amsterdam, ku u bë soliste e dytë. Ted Brandsen, drejtor i Baletit Kombëtar, e përshkroi atë si një kërcimtare me fuqi të jashtëzakonshme kërcyese dhe karizëm të madh. Performanca e saj e famshme e vitit 2015 u kujtua si një frymëzim për shumë njerëz.

Michaela de Prince ka fituar zemrat e audiencës në mbarë botën me pasionin e saj për kërcimin. Talenti i saj nuk kaloi pa u vënë re dhe ajo pati një mundësi të shfaqej në videot e Beyoncé dhe grupit holandez Chef'Special, si dhe duke luajtur rolin kryesor në filmin Coppelia (2021). Dëshira e saj për të ndihmuar fëmijët në luftë erdhi nga përvoja e saj dhe organizata War Child shprehu trishtim për lajmin e vdekjes së saj.