Kreu i diplomacisë bjelloruse, Makei, vdiq papritur
Ministri i Jashtëm i Bjellorusisë, Vladimir Makei, ka ndërruar jetë papritur në moshën 64-vjeçare, konfirmoi ministria përkatëse.
Agjencia Belta raportoi se Makei "vdiq papritur".
Makei ka shërbyer si Ministër i Jashtëm që nga viti 2012.
Më parë këtë javë, ai mori pjesë në një konferencë të Organizatës së Traktatit të Sigurisë Kolektive (CSTO) – një aleancë ushtarake e disa shteteve post-sovjetike – në Jerevan dhe do të takohej me homologun e tij rus Sergej Lavrov të hënën.
Para zgjedhjeve presidenciale dhe protestave masive antiqeveritare në Bjellorusi në vitin 2020, Makei ishte një nga nismëtarët e përpjekjeve për të përmirësuar marrëdhëniet e Bjellorusisë me vendet perëndimore dhe kritikoi Rusinë. Por pas fillimit të protestave, ai ndryshoi befas qëndrimin e tij, duke pretenduar se demonstratat ishin frymëzuar nga agjentë perëndimorë.
“Jemi të tronditur nga lajmi për vdekjen e kreut të Ministrisë së Punëve të Jashtme të Republikës së Bjellorusisë, Vladimir Makei”, tha zëdhënësja e Ministrisë së Jashtme ruse Maria Zakharova në kanalin e saj Telegram.
“Rusia së shpejti do të shpallë lajmin për ngushëllimet zyrtare”, shtoi ajo.