Navalny kërkoi që Perëndimi të zgjerojë listën e oligarkëve rusë të sanksionuar

Politikani rus Alexei Navalny / EPA foto

Disidenti rus Alexei Navalny i bëri thirrje Perëndimit të vendosë sanksione edhe më të forta kundër oligarkëve rusë, në kushtet kur Moska vazhdon luftën në Ukrainë.

“Të mos harrojmë, sanksionet janë të nevojshme për ta bërë agresorin të ndalojë luftën. Për të bërë presion mbi të. Zgjidhje komplekse si embargoja e naftës dhe gazit janë të disponueshme. Por ka edhe sanksione shumë të thjeshta, personale. Nuk u duhet gjë tjetër veç vullnet politik”, ka shkruar ai nga burgu ku po vuan dënimin e gjatë.

Në një sërë postimesh në Twitter, Navalny kritikon faktin se drejtori i kompanisë shtetërore të naftës “Rosneft” Igor Sechin është në listën e personave të sanksionuar, ndërsa drejtori i “Gazprom” Alexey Miller jo.

Si shembull, ai tregoi edhe miliarderin Roman Abramovich, i cili gjithashtu nuk është në listën amerikane të oligarkëve rusë të sanksionuar.

Nga 200 shtetasit më të pasur rusë nga lista e edicionit rus të “Forbes”, mezi një e katërta janë në listën e sanksionuar, shkruan Navalny.

Navalny aktualisht është duke vuajtur një dënim me nëntë vjet burg, të vendosur për krimin e dyshuar të "mashtrimit". Ai konsiderohet i burgosur politik për shkak të kritikave të hapura ndaj autoriteteve ruse.

Video e ditës