Të paktën trembëdhjetë persona humbën jetën dje nga një stuhi e fortë në Evropë. Dy fëmijë, katër dhe tetë vjeç, vdiqën në Austrinë jugore kur pemët ranë pranë një liqeni në Carinthia. Një duzinë persona u plagosën, disa prej tyre në gjendje të rëndë. Tre persona humbën jetën në Austrinë e Poshtme.

Në Styria, Carinthia dhe Tirolin Lindor, trenat u detyruan të ndalonin për shkak të ndërprerjeve të energjisë elektrike të shkaktuara nga stuhia dhe pemët e rrëzuara bllokuan gjithashtu disa rrugë, thanë autoritetet.

Gjashtë persona humbën jetën në Korsikë, thanë autoritetet franceze.Një pemë ra mbi një vajzë 13-vjeçare në një kamp në Sagon në bregun perëndimor të ishullit.

Në jug të ishullit, një grua 72-vjeçare vdiq kur çatia e një shtëpie ra mbi makinën e saj. Një grua me kajak, një peshkatar dhe dy të tjerë u vranë gjithashtu.

Ministri francez i brendshëm, Gérald Darmanin, i cili po viziton Korsikën, tha se era në ishull po frynte me një shpejtësi deri në 200 kilometra në orë. 12 persona u plagosën në stuhi, njëri prej tyre seriozisht. Për shkak të stuhisë, 45.000 mijë familje kanë mbetur pa energji elektrike.

Stuhi të forta goditën edhe pjesë të tjera të Francës, duke përmbytur rrugët e Marsejës dhe Cassis aty pranë.

Dy persona kanë humbur jetën nga stuhia në Toskanë. Pemët ranë mbi një burrë dhe një grua. Zjarrfikësit kanë pasur 150 ndërhyrje në Liguria dhe Toskanë. Rajoni qendror i Emilia Romagna u godit gjithashtu rëndë nga stuhia.

Evropa është e prekur nga kushtet ekstreme të motit gjatë gjithë verës, që sipas ekspertëve është pasojë e ndryshimeve klimatike.

Zjarre pyjore ka në jug të Italisë, Sicili dhe ishullin Pantelleria, dhe veriu i vendit u godit nga një stuhi pas një thatësire të gjatë.

Spanja, ashtu si Franca, u shkatërrua nga zjarret, por shiu të paktën e vuri nën kontroll zjarrin në Valencia. Pothuajse 2.000 njerëz janë evakuuar, por tani mund të kthehen, raportojnë mediat spanjolle.

Bashkimi Evropian po regjistron zjarret më të këqija në pyje këtë kohë të vitit që nga fillimi i monitorimit të përbashkët në vitin 2006, sipas Komisionit Evropian.