Në një referendum të mundshëm për anëtarësim në Bashkimin Evropian, 44 për qind e qytetarëve të Serbisë do të votonin për anëtarësim, ndërsa 42 për qind e të anketuarve deklaruan se janë kundër anëtarësimit, sipas rezultateve të sondazhit të opinionit publik të kryer nga Qendra për Hulumtime. Transparenca dhe Përgjegjshmëria (CRTA).

Sondazhi i kryer në fund të shkurtit dhe fillim të marsit gjithashtu tregoi se 43 për qind e të anketuarve besojnë se Serbia nuk do të bëhet kurrë anëtare e BE-së.

Në pyetjen se cila do të ishte zgjidhja ideale për Kosovën, 38 për qind e të anketuarve nuk kishin përgjigje dhe po aq qytetarë deklaruan se nuk e dinë se cili mund të jetë rezultati aktual i negociatave në vazhdim mes Beogradit dhe Prishtinës.

Anketa tregon se 30 për qind e qytetarëve deklarojnë hapur se nuk e dinë se çfarë përfshin marrëveshja evropiane për normalizimin e marrëdhënieve ndërmjet Beogradit dhe Prishtinës, ndërsa shtatë për qind e tyre vlerësojnë se është një hap drejt marrëveshjes përfundimtare.

Sipas rezultateve, për shumicën e qytetarëve propozimi francezo-gjerman është i papranueshëm, ndërsa 26 për qind e të anketuarve do ta pranonin propozimin dhe 20 për qind do ta pranonin pavarësinë e Kosovës nëse sigurohet një pozitë më e mirë e serbëve në Kosovë.

Të pyetur për drejtimin strategjik që Serbia duhet të ndjekë, 44 për qind e të anketuarve kanë deklaruar se duhet të kthehet më shumë drejt Perëndimit, dhe 43 për qind besojnë se Serbia duhet të krijojë lidhje më të forta me Rusinë. Qytetarët e perceptojnë Rusinë si partnerin më të rëndësishëm politik (34 përqind) dhe të sigurisë (42 përqind) të Serbisë, ndërsa BE-në e shohin si partnerin më të rëndësishëm ekonomik (44 përqind).