Në rrjetet sociale ndahen ngushëllime familjes Bunjaku pas vrasjes së Hebib Bunjakut, i cili mbrëmë humbi jetën në një shkëmbim zjarri në Çair. Ai është djali i ish-zyrtarit të BDI-së, Ekrem Bunjaku.

-Të Allahut jemi dhe tek Ai do të kthehemi! Ka ndërruar jetë Hebib Bunjaku, djali më i mirë i lagjes sonë në Seravë, i njohur për miqësinë e tij të gjerë përmes futbollit dhe për shumë atribute të tjera. Si fqinjë që ndanë të njëjtat halle në të njëjtën lagje dhe në shenjë respekti, i shpreh ngushëllimet e mia xhaxhit Ekrem dhe gjithë familjes së tij! – thuhet në një nga postimet.

Sipas informacioneve të MPB-së, një mosmarrëveshje në komunikacion ka qenë shkak për një debat mes dy grupeve që ka rezultuar me të shtënat që kanë ndodhur mbrëmë në një parking në Çair.

Sipas informatave shtesë nga MPB-ja, të shtënat kanë ndodhur rreth dhjetë minuta para mesnatës, ndërsa më pas nga Spitali i Përgjithshëm i Qytetit “Shën Naum Ohri” kanë raportuar se me lëndime janë sjellë dy persona nga Shkupi të moshës 35 vjeçare.

Të shtëna në Çair – Vritet djali i ish-zyrtarit të BDI-së

Njëri nga të lënduarit, Hebib Bunjaku, sipas informacioneve tona jozyrtare, është djali i ish-zyrtarit të lartë të BDI-së, Ekrem Bunjaku, ndërsa i plagosuri tjetër, Ariton Darlishta, po mbahet për trajtim pasi i është nënshtruar një ndërhyrjeje.

Një tjetër person i plagosur është dërguar në spital dhe katër persona janë ndaluar në lidhje me ngjarjen.

Një keqkuptim në komunikacion ka qenë shkak i të shtënave në Çair, thonë nga MPB.