Këngëtari amerikan Sufjan Stevens zbuloi se po mëson të ecë përsëri pasi u diagnostikua me sindromën Guillain-Barré, një çrregullim i rrallë neurologjik në të cilin sistemi imunitar sulmon qelizat nervore, shkruan "CNN".

Muzikanti shkroi se gjatë shtrimit në spital kaloi dy javë në repartin mjeko-kirurgjik, ku iu nënshtrua një programi trajtimi pesë-ditor dhe mori infuzione me imunoglobulinë për të parandaluar "përhapjen e sëmundjes në mushkëri, zemër dhe tru".

“Muajin e kaluar u zgjova një mëngjes dhe nuk mund të ecja. Krahët dhe këmbët e mia ishin mpirë dhe nuk kisha forcë, ndjenjë, lëvizje”, shkroi Stevens në blogun e saj, duke shtuar se diagnozën e mësoi pas një sërë testesh në spital.

Rastet e rënda të sindromës Guillain-Barré mund të shkaktojnë dobësi të muskujve që çon në paralizë, duke ndërhyrë potencialisht me frymëmarrjen dhe presionin e gjakut ose rrahjet e zemrës.

Në rastin e Stevens, rikuperimi është në horizont pasi ai fillon "terapinë intensive fizike, duke ndërtuar forcë, për ta kthyer trupin në formë dhe për të mësuar të ecë përsëri".

“Mjekët e mi bënë gjithçka për të më mbajtur gjallë dhe për të stabilizuar gjendjen time. Ua kam borxh jetën time”, shtoi ai.

Stevens është një këngëtar i famshëm indie i cili u nominua për një çmim Oscar në 2018 për këngën origjinale "Mystery of Love" nga filmi "Call Me By Your Name". Ai po përgatiste albumin e tij të dhjetë në studio, Javelin, i cili do të dalë më 6 tetor, para se të përfundonte në spital.