Në Klinikën Infektive nuk ka asnjë pacient të shtruar të dyshuar për lisë majmuni, njoftoi Ministria e Shëndetësisë pas përhapjes së lajmit në media se një pacient i tillë ka në spitalin e Kërçovës.

“Sa i përket pacientit të përmendur në media, sipas informacioneve nga spitali i Kërçovës, bëhet fjalë për një pacient të dyshimtë, i cili është në gjendje të mirë shëndetësore dhe me rezultate të rregullta laboratorike, i cili është rekomanduar për analizë”, ka thënë Ministria e Shëndetësisë.

Nga aty, shtojnë ata, aktualisht është duke u organizuar një ekip epidemiologjik për të kryer një anketë epidemiologjike.

“Deri më tani nuk është dorëzuar asnjë material testues në Institutin e Shëndetit Publik dhe nuk ka asnjë rast të konfirmuar të lisë së majmunëve në vend”, thekson ministria.

Ministri i Shëndetësisë, Bekim Sali, dhjetë ditë më parë bëri të ditur se Instituti i Shëndetësisë Publike ka teste të mjaftueshme për diagnostikimin e lisë së majmunit dhe se ka marrë konfirmimin nga koordinatori kombëtar për imunizimin se shteti ka vaksina në dispozicion nëse shfaqet një rast.