Ministri i Çështjeve Evropiane Orhan Murtezani ka takuar ambasadorin e sapoemëruar të Republikës së Italisë në Republikën e Maqedonisë, Paolo Palminteri.

Ministri Murtezani përshëndeti mbështetjen e vazhdueshme dhe parimore të Italisë për politikën e zgjerimit të Bashkimit Evropian, si një nga shtetet anëtare themeluese. Bashkëbiseduesit konstatuan se ky angazhim është i një rëndësie thelbësore për ruajtjen dhe avancimin e dinamikës aktuale të procesit të zgjerimit.

Në këtë kuadër u theksua edhe roli aktiv i Italisë në grupin “Miqtë e Zgjerimit”, gjë që u konfirmua edhe njëherë nga takimi i djeshëm në Romë.

Murtezani dhe Palminteri rikonfirmuan bashkëpunimin e suksesshëm në kuadrin e instrumenteve evropiane, si IPA Twinning dhe TAIEX, ku deri më tani janë zbatuar tetë projekte të Binjakëzimit me partnerët italianë në fushën e mjedisit, bujqësisë, krimit të organizuar dhe zhvillimit të sektorit privat. Ministri Murtezani inkurajoi palën italiane që të marrë pjesë edhe më tej në këto programe, të cilat kontribuojnë ndjeshëm në harmonizimin me standardet evropiane. Po ashtu, u theksua se Maqedonia e Veriut tashmë është pjesë e programeve territoriale ndërrajonale dhe transnacionale – URBACT, Interreg Europe, Euro-Med dhe Adrion, gjë që hap mundësi të reja për forcimin e partneriteteve ndërmjet institucioneve dhe qytetarëve të dy vendeve”, thuhet në njoftimin e zyrës së Murtezanit.

Ministri Murtezani dhe ambasadorja Palminteri konfirmuan përkushtimin e tyre të përbashkët për thellimin e bashkëpunimit bilateral, me qëllim përfundimtar përshpejtimin e procesit të integrimeve evropiane të Maqedonisë.