Ekonomia e Kosovës mund të shkojë në recesion si pasojë e inflacionit të lartë që ka goditur vendin dhe rrjedhimisht uljes së aktivitetit ekonomik.

Kështu kanë thënë për Radion Evropa e Lirë profesori i ekonomisë në Universitetin e Prishtinës, Mejdi Bektashi dhe kryetari i Odës Ekonomike të Kosovës, Lulzim Rafuna.

Një recesion përshkruhet si një tkurrje e ciklit të biznesit dhe si rezultat ka një rënie të përgjithshme të aktivitetit ekonomik.

Rritja reale ekonomike e Kosovës, sipas Bektashit, nuk është më shumë se 2 deri në 3 për qind dhe kjo rritje, shton ai, “nuk mjafton për t’i shpëtuar recesionit”.

“Problemi është se tani inflacioni, i pastabilizuar nga indeksimi i pagave, qoftë në sektorin publik apo privat, po shkakton ulje të kërkesës që mund të çojë në recesion”, thotë Bektashi.

Sipas të dhënave të Bankës Evropiane për Rindërtim dhe Zhvillim (BERZH), Kosova do të shënojë rritje ekonomike prej 2022 për qind në vitin 3,5 dhe po aq parashikohet edhe për këtë vit.

Inflacioni, 6,3 për qind

Në Kosovë, në muajin prill, sipas të dhënave të Agjencisë së Statistikave, inflacioni ishte 6,3 për qind më i lartë krahasuar me periudhën e njëjtë të vitit të kaluar.

Rritje çmimesh vihet re për produktet ushqimore, karburantet, transportin etj.

Kur mund të ndodhë një recesion?

Bektashi thotë se në periudhën aktuale kur pritet ardhja e diasporës kosovare nuk pritet të ketë recesion, sepse ka rritje të sasisë së parave në ekonomi.

Por pas largimit të diasporës në fund të muajve të verës mund të prezantohet.

“Mos investimi në rrugë, ruajtja e buxhetit të shtetit duke mbajtur paratë të ngrira, mos investimi mund të shkaktojë mungesë parash që do të shprehet në sektorin e ndërtimit dhe tregtisë”, thotë ai.

Sektori i ndërtimit dhe i tregtisë janë dy nga sektorët me aktivitet më të madh ekonomik në Kosovë.

Sipas të dhënave të Bankës Qendrore të Kosovës, remitencat vetëm vitin e kaluar arritën vlerën mbi 1,2 miliardë euro.