Rusia ka thënë se po dëbon gjithsej 85 diplomatë nga Franca, Spanja dhe Italia në përgjigje të lëvizjeve të ngjashme nga këto vende, duke vënë në dukje se marrëdhëniet me anëtarët kryesorë të BE-së kanë qenë të tensionuara që nga fillimi i luftës kundër Ukrainës.

Ambasadorët e Francës, Italisë dhe Spanjës janë thirrur sot për bisedime në Ministrinë e Jashtme ruse, ku janë njoftuar zyrtarisht për vendimet e marra nga Moska.

Ministria e Jashtme tha se po dëbonte 34 anëtarë të stafit diplomatik nga Franca, 27 nga Spanja dhe 24 nga Italia.

Të tre vendet evropiane së bashku kanë dëbuar më shumë se 300 rusë që nga fillimi i pushtimit të Ukrainës më 24 shkurt. Diplomatët rusë janë akuzuar për spiunazh, të cilin Moska e mohon.

Rusia dëboi 45 diplomatë polakë dhe 40 gjermanë muajin e kaluar. Ajo ka njoftuar masa hakmarrëse kundër Finlandës, Rumanisë, Danimarkës, Suedisë, Norvegjisë dhe Japonisë, ndër të tjera.

Kryeministri italian Mario Draghi e përshkroi veprimin e Moskës si një "akt armiqësor" dhe paralajmëroi se kanalet diplomatike nuk duhet të ndërpriten. “Kjo absolutisht nuk duhet të çojë në ndërprerjen e kanaleve diplomatike, sepse përmes këtyre kanaleve, nëse ia dalim, do të arrihet paqja që duam sigurisht”, tha kryeministri italian.

Parisi sot "dënoi ashpër" dëbimin e 34 diplomatëve francezë dhe tha se vendimi i Rusisë "nuk ka bazë legjitime".

"Pala ruse ka paraqitur vendimin në përgjigje të vendimeve të Francës" që nga prilli, kur disa dhjetëra agjentë rusë u dëbuan me dyshimin se ishin spiunë, tha ministria e jashtme franceze.