Sindikata që përfaqëson mjekët e rinj në Britaninë e Madhe ka njoftuar sot se do të mbajë një grevë katërditore, duke filluar nga 11 prilli, për shkak se Qeveria nuk ka bërë një ofertë të re më të mirë për rritjen e pagave të tyre.

Deklarata e sindikatës thoshte se mjekët e rinj do të grevonin derisa të paguhen "aq sa vlejnë".

Dhjetëra mijëra mjekë të rinj kanë qenë në grevë për tre ditë në të gjithë Mbretërinë e Bashkuar që nga 13 marsi, duke kërkuar një rritje pagash në përputhje me inflacionin, të cilën qeveria e ka refuzuar, duke thënë se do të shkaktonte një normë edhe më të lartë inflacioni.

Në Britaninë e Madhe që nga fundi i vitit të kaluar filluan grevat e punëtorëve në shumë zona, të cilët kërkuan rritje të pagave në përputhje me inflacionin.