Një mision i Kombeve të Bashkuara mbërriti sot në Nagorno-Karabakh, njoftuan mediat azerbajxhanas.

Është hera e parë në 30 vitet e fundit që organizata ndërkombëtare ka fituar akses në Nagorno-Karabakh.

Armenia i kërkoi më parë Gjykatës Ndërkombëtare të Drejtësisë që të urdhërojë Azerbajxhanin të tërheqë të gjitha trupat nga objektet civile në Nagorno-Karabakh dhe të lejojë aksesin e OKB-së.

Azerbajxhani ka hedhur poshtë akuzat për spastrim etnik në enklavën e Nagorno-Karabakh të popullsisë së tij etnike armene dhe pohon se banorët e tij janë të lirë të qëndrojnë ose të shkojnë.

Kryeministri armen, Nikol Pashinyan, ka akuzuar vazhdimisht Azerbajxhanin për spastrim etnik që kur përpjekja dhjetëvjeçare e enklavës për t'u shkëputur nga sundimi i Azerbajxhanit përfundoi me humbje të papritur më 20 shtator.

Pashinyan tha se më shumë se 100.000 nga afro 120.000 banorët e Nagorno-Karabakh kanë ikur në Armeninë fqinje.

"Ne nuk mund të pranojmë akuzat për spastrim etnik ose gjenocid," tha mbrëmë Hikmet Hadjiev, këshilltar diplomatik i presidentit të Azerbajxhanit Ilham Aliyev.

"Spastrimi etnik është një veprim i dhunshëm, kur dikush përdor forcë kundër civilëve - (që është) pikërisht ajo që përdori Armenia kundër nesh, 30 vjet më parë."

“Por kjo nuk do të thotë se do të përsërisim të njëjtën gjë. Nuk ka pasur asnjë rast të vetëm të dhunës apo krimit ndaj civilëve. E konfirmojnë vetë”, pohon Haxhiev.

"Dhe nuk kishte qytetarë 'armenë' në Karabakh," shtoi ai.

"Ne i kemi konsideruar gjithmonë ata qytetarë të Azerbajxhanit, por fatkeqësisht entiteti i paligjshëm separatist nuk na ka lejuar të kemi komunikim të drejtpërdrejtë me ta," tha ai për separatistët etnikë armenë që kanë sunduar enklavën për tre dekada.

Ai tha se Azerbajxhani kishte "angazhuar trupa të sigurisë së brendshme për të koordinuar me të ashtuquajturat autoritetet lokale armene".

“Ata ende kontrollojnë qytetet”, theksoi ai.