Në përputhje me rekomandimet e Qeverisë, Ministria e Transportit dhe Post-Telekomunikacionit ka zbatuar masat pa ndërprerje të procesit të punës dhe ka kursyer 47 për qind të energjisë elektrike në tetor 2022, krahasuar me të njëjtin muaj të vitit të kaluar.

Në këto kohë kur të gjithë po i ndjejnë pasojat e krizës botërore energjetike dhe mungesës së energjisë, me masa në kohë dhe respektim të rekomandimeve mundësojmë furnizim të sigurt dhe të pandërprerë me energji elektrike, njofton Ministria.

Kjo është vetëm një dëshmi tjetër se masat sjellin rezultate. Të gjithë mund të japin një kontribut në stabilitetin e furnizimit me energji elektrike dhe kjo varet drejtpërdrejt nga sjellja jonë individuale. Efiçienca e energjisë, pra përdorimi racional i burimeve, do të mundësojë uljen e faturave, rritjen e konkurrencës së ndërmarrjeve, por edhe kursime të mëdha në buxhetin e shtetit. Çdo kursim, sado që të jetë, ka një rëndësi të madhe. Po vijnë muaj më të ftohtë dhe për këtë duhet të jemi të kujdesshëm dhe të respektojmë rekomandimet për kursime, njofton Ministria.

Ata theksojnë se në këtë kursim të arritur kanë luajtur një rol të rëndësishëm punonjësit e tyre të cilët kanë respektuar vazhdimisht dhe me ndërgjegje masat e rekomanduara.

Shfrytëzimi racional i energjisë elektrike nëpërmjet masave të vendosura, të cilat rezultuan të përshtatshme për institucionin tonë, do të vazhdojë të zbatohet edhe në muajt në vijim. Të gjithë së bashku, në solidaritet dhe në mënyrë racionale, duhet të përdorim burimet që kemi në dispozicion. Ne qëndrojmë për një sistem të qëndrueshëm energjetik, sepse është një nevojë për të gjithë ne. Të përkushtuar dhe me angazhim maksimal, së bashku do t'i kalojmë këto sfida që janë përballë nesh, thekson Ministria e Transportit dhe Post-Telekomunikacionit.