Ministri i Shëndetësisë, Dr. Fatmir Majiti, është në pritje që Inspektorati Shtetëror Shëndetësor dhe Sanitar të përfundojë inspektimin e jashtëzakonshëm në spitalin e Manastirit dhe më pas në bazë të fakteve të ndajë detaje për rastin në të cilin Jana gjashtë vjeçare ka ndërruar jetë. Lidhur me rastin, kryeministri Dimitar Kovaçevski tha se drejtori i spitalit të Manastirit, dr. Aleksandar Obednikovski, është nisur për në Shkup ku do të ketë takim me kryesinë e Ministrisë së Shëndetësisë.

– Është njoftuar Prokuroria Publike. Të gjitha detajet do të ndahen me publikun. Në bazë të fakteve duhet të përcaktohet gjendja objektive dhe në bazë të atyre fakteve të vendosen sanksione përkatëse aty ku është e nevojshme, tha kryeministri Kovaçevski.

Ministria e Shëndetësisë ende nuk ka kontaktuar me familjen.

- Do të kemi kontakt me ta, fillimisht për të parë se cili është gabimi. Jemi në pritje të rezultatit nga institucionet kompetente, nga DSZI, dhe për gjithçka do të bëjmë në vijim, sot gjatë ditës menjëherë do të jeni të informuar, tha ministri Majiti.

Familja dje në një prononcim për “Sloboden Pechat” ka pohuar se përkeqësimi i gjendjes shëndetësore të Janës ka ndodhur para syve të tyre, teksa ndodheshin në spitalin e Manastirit, pasi i ishte administruar glukozë e pastër në gjak tashmë të ngritur.