Ministrja e Mbrojtjes Slavjanka Petrovska do të marrë pjesë dhe do të mbajë fjalim në Forumin e parë Schuman për siguri dhe mbrojtje në Bruksel me ftesë të Përfaqësuesit të Lartë të Bashkimit Evropian për politikë të jashtme dhe të sigurisë, Josep Borel.

Në Forum, siç informohet nga Ministria, do të marrin pjesë përfaqësues nga 27 shtetet anëtare të Unionit dhe 45 vende partnere, duke përfshirë mbi 20 ministra të mbrojtjes, si dhe përfaqësues të organizatave ndërkombëtare dhe rajonale si Kombet e Bashkuara, NATO, OSBE, Bashkimi Afrikan, ASEAN, Këshilli i Bashkëpunimit të Gjirit dhe Lidhja e Shteteve Arabe. Do të marrin pjesë gjithashtu organizata joqeveritare, organizata think-tank dhe përfaqësues të komunitetit akademik.

Forumi Schuman mbahet nën moton "Së bashku më të fortë në një botë të paqëndrueshme" dhe organizohet nën patronazhin e Borel. Qëllimi i këtij Forumi, thekson Ministria, është të forcojë bashkëpunimin ndërmjet aktorëve relevantë globalë dhe rajonalë në fushën e sigurisë dhe mbrojtjes dhe të jetë një forum ku do të diskutohen çështjet kyçe të sigurisë dhe mënyrat e forcimit të paqes dhe sigurisë ndërkombëtare.