Ministria e Financave ka kryer të gjitha përllogaritjet e nevojshme, që do të thotë se do të realizohet rritja e paralajmëruar e pagës minimale, si dhe rritja lineare e pagave në sektorin publik, njoftoi ministri i Ekonomisë Kreshnik Bekteshi. Sipas njoftimeve të ekipit ekonomik të qeverisë në muajin mars, paga minimale do të jetë rreth 20.500 denarë dhe kjo do të vlejë si për sektorin privat ashtu edhe për atë publik, dhe ato mjete janë të parapara me Buxhetin për vitin 2023.

Por për të pasur barazi, pagat në administratën shtetërore duhet të rriten linearisht për 2.000 denarë, mjete që janë të parapara në të gjitha institucionet, shtoi Bekteshi. Në rast se duhet të miratohet një ligj, ai është i bindur se këto plane do të kenë mbështetje nga të gjitha partitë politike në Kuvend.

- Kemi futur një zgjidhje ligjore për përcaktimin e pagës minimale. Metodologjia është plotësisht në përputhje me sindikatat dhe institucionet. Duke pasur parasysh rritjen e pagës minimale, pres që të ketë rritje lineare prej mbi 2.000 denarë për secilën kategori të nëpunësve civilë. Nëse dikush kundërshton rritjen e pagave, mendoj se do të bëjë një gabim të madh dhe nëse do të merret një zgjidhje ligjore, me shumë mundësi do ta mbështesin të gjitha partitë politike. Për shkak të inflacionit dhe pritshmërive të qytetarëve duhet të bëjmë gjithçka që kemi në dorë për rritjen e pagave dhe në atë drejtim do të veprojmë si Qeveri. Siç njoftoi ministri i Financave, Fatmir Besimi, janë bërë të gjitha projeksionet dhe kalkulimet, të cilat ai vetë i ka bërë të ditur”, ka theksuar Bekteshi.

Ndërsa zëvendëskryeministri për Çështje Ekonomike, Fatmir Bitici, ka bërë të ditur se ka zgjidhje sistematike për pagën minimale dhe pensionet që arrihet përmes dialogut social.

– Për këtë nuk do të ketë më shantazhe, nuk do të ketë oferta mes sindikatave dhe punëdhënësve. Së bashku kemi përcaktuar një metodologji, kriteret e rritjes janë kostoja e jetesës, pra inflacioni dhe rritja e pagës mesatare. Është një zgjidhje e koordinuar e sistemit – tha së fundmi Bitici. Ai shtoi se në muajin mars, përveç rritjes së pagës minimale, do të ketë edhe korrigjim të pagave në sektorin publik.

- Në muajin mars paga në sektorin publik do të rritet linearisht me aq sa është rritur paga minimale. Me Ligjin për zyrtarët administrativë të gjithë do të mbulohen – tha Bitici, duke shtuar se paratë në buxhet tashmë janë siguruar.