Korriku i kaluar ishte një nga më të nxehtit e regjistruar ndonjëherë që nga mbajtja e të dhënave, tha sot Organizata Botërore Meteorologjike, agjencia e specializuar e OKB-së me qendër në Gjenevë.

“Mund të themi se korriku i këtij viti është një nga tre më të nxehtët e regjistruar ndonjëherë, me një valë të nxehtë intensive dhe afatgjatë që ka prekur shumë pjesë të Evropës”, ​​tha Claire Nullis, zëdhënëse e organizatës.

Në konferencën për shtyp u njoftua se korriku i këtij viti ishte vetëm pak më i ftohtë se ai i dy viteve më parë, por edhe pak më i ngrohtë se 2016-ta.

"Por diferenca e temperaturës midis atyre tre muajve ishte vërtet shumë e vogël," tha Nullis.

Në nivel global, temperatura e regjistruar muajin e kaluar është 0,4 gradë Celsius më e lartë se ajo e referencës për periudhën 1991-2020, dhe kjo në kushtet kur pritej një “efekt ftohës” për shkak të fenomenit natyror La Niña.

Muajin e kaluar, Organizata Botërore Meteorologjike u bëri thirrje liderëve botërorë të “zgjohen”, duke paralajmëruar se Evropa po kalon një sërë valësh të pazakonta të të nxehtit, të cilat, për shkak të ndryshimeve klimatike, do të bëhen më të shpeshta dhe do të ndodhin vazhdimisht deri të paktën në vitin 2060.