Tenisti legjendar amerikan qëndroi pas Novak Gjokoviç dhe kërkoi nga qeveria amerikane që ta lejojë serbin të luajë në turneun e fundit Grand Slam të vitit, US Open.

Megjithëse qeveria amerikane ka lehtësuar masat e saj në lidhje me pandeminë e koronavirusit, ajo ende nuk i lejon personat e pavaksinuar të hyjnë në vend.

– Novak duhet të lejohet të luajë në Nju Jork. Gjithçka që ndodh rreth tij është marrëzi dhe se si do të përfundojë gjithçka, do ta shohim. Qeveria amerikane duhet të ketë mirëkuptim ndaj një prej tenistëve më të mirë në botë të të gjitha kohërave – tha McEnroe.

Ish-tenisti e kupton gjithashtu qëndrimin e Novak Gjokoviç për vaksinimin kundër koronavirusit. McEnroe beson se Gjokoviç e njeh trupin e tij më së miri dhe ka të drejtë të zgjedhë atë që ai mendon se është më e mira për të.

- Gjokoviç i qëndron qëndrimeve të tij dhe absolutisht ka të drejtë të marrë vetë vendime të tilla. Ai është një nga sportistët më të mirë të të gjitha kohërave. Ai zgjedh atë që vendos në trupin e tij me shumë kujdes, ndaj është zhgënjyese që në këtë pikë, kur masat janë relaksuar totalisht dhe të gjithë po argëtohen, Novak është i përjashtuar nga US Open. Me të vërtetë nuk ka kuptim - mendon McEnroe.