Protesta masive në Mynih kundër të djathtës ekstreme
Më shumë se 200.000 njerëz u mblodhën sot në Mynih për një protestë të re masive kundër së djathtës ekstreme, tha policia në kryeqytetin bavarez.
Rekomanduar
“Vlerësimi ynë është se janë më shumë se 200.000 mijë njerëz”, tha policia, vlerësimi i parë i së cilës, kur filloi mitingu, ishte sa gjysma.
Dy javë para zgjedhjeve parlamentare, protestuesit e mbledhur me sloganin “Demokracia ka nevojë për ju” po kundërshtojnë çdo bashkëpunim me partinë e ekstremit të djathtë Alternativa për Gjermaninë.
Organizatorët e demonstratës së sotme "Mynihu është shumëngjyrësh" duan të dërgojnë një "sinjal të fortë në favor të diversitetit, dinjitetit njerëzor, bashkimit dhe demokracisë" përpara zgjedhjeve.
"Gjyshja kundër të djathtës ekstreme", një lëvizje e krijuar në vitin 2018, e frymëzuar nga një nismë e ngjashme në Austri, sot bëri thirrje për demonstrata në disa qytete gjermane, përfshirë Hanoverin, ku sipas të dhënave të policisë, protestuan 24.000 njerëz.
Javën e kaluar, më shumë se 160.000 njerëz protestuan kundër së djathtës ekstreme në Berlin.
Protestat filluan javën e kaluar pasi kandidati konservator për kancelar dhe kandidati kryesor i zgjedhjeve Friedrich Merz filloi t'i afrohej AfD-së, pasi ai mbështetej në mbështetjen e tyre në parlament për të miratuar një propozim jodetyrues për të bllokuar të gjithë të huajt pa dokumente, përfshirë azilkërkuesit, në kufi.
Partitë tradicionale deri tani kanë refuzuar çdo bashkëpunim në nivel kombëtar me të djathtën ekstreme në emër të të ashtuquajturit “muri mbrojtës” i ngritur kundër formacionit nacionalist dhe antiemigrant.
Konservatorët, të cilët u takuan në një kongres më parë këtë javë, e bënë të qartë se ata përjashtuan çdo qeveri me AfD, e cila është e dyta në sondazhe, pak pas tyre.
Zgjedhjet e parakohshme parlamentare janë caktuar për 23 shkurt.
