Elon Musk dhe një grup ekspertësh të inteligjencës artificiale po bëjnë thirrje për një pauzë gjashtëmujore në zhvillimin e sistemeve më të fuqishme se GPT-4 i lëshuar së fundmi, në një letër të hapur që paralajmëron rreziqet e mundshme për shoqërinë dhe njerëzimin.

Në fillim të këtij muaji, kompania OpenAI në bashkëpunim me Microsoft publikoi versionin e katërt të programit GPT (Generative Pre-trained Transformer), i cili fitoi mbi përdoruesit për shkak të gamës së gjerë të përdorimeve, nga kompozimi i këngëve deri te kompresimi i teksteve të gjata.

Letra, e publikuar nga Instituti jofitimprurës Future of Life dhe e nënshkruar nga më shumë se një mijë njerëz, përfshirë Musk, bën thirrje për një pauzë në zhvillimin e inteligjencës artificiale të avancuar derisa ekspertë të pavarur të dalin me protokollet e sigurisë.

“Sistemet e fuqishme të AI duhet të zhvillohen vetëm kur kemi besim se efektet e tyre do të jenë të dobishme dhe se rreziqet mund të menaxhohen”, thuhet në letër.

Autorët tregojnë për rreziqet në formën e ndërprerjeve ekonomike dhe politike dhe u bëjnë thirrje zhvilluesve të bashkëpunojnë me autoritetet dhe organet rregullatore.

Shqetësimet e tyre përkojnë me një paralajmërim nga Europol, i cili të hënën vuri në dukje një sërë problemesh etike dhe ligjore të sjella nga ChatGPT, në lidhje me keqpërdorimet e mundshme për sulme kibernetike, dezinformata dhe krime kibernetike.