Lufthansa pret veprime nga aktivistët e klimës në vetë fluturimet, sipas një dokumenti të brendshëm të publikuar nga media gjermane të dielën.

“Aktivistët, si pasagjerë të rregullt, mund të hyjnë në aeroplan dhe të ndërpresin fluturimin, apo edhe ta ndalojnë atë”, thuhet në një paralajmërim të brendshëm dërguar punonjësve nga menaxhmenti i Lufthansa, transmeton Hina.

Avionët gjithashtu mund të "ndoten" me bojë, siç ishte tashmë rasti me veprat e artit apo monumentet kulturore si Porta e Brandenburgut. Kur u pyet nga media, Lufthansa nuk pranoi të jepte detaje, duke përmendur çështje të ndjeshme sigurie. Ditët e fundit, në mes të sezonit të festave, aktivistët e klimës kanë sulmuar aeroportet dhe kanë bllokuar trafikun duke u kapur pas pistave. Të premten, policia në Hamburg arrestoi disa aktivistë që po përpiqeshin të hynin në aeroport dhe të bllokonin trafikun duke u kapur pas pistave.

Avokatët i thanë mediave gjermane se ndërprerja e qëllimshme e një fluturimi në vetë aeroplan mund të ketë pasoja të rënda ligjore për aktivistët, duke përfshirë vite burg. Anëtarët e lëvizjes "Brezi i fundit" kanë njoftuar se do të vazhdojnë protestat e tyre derisa qeveria gjermane të ndërmarrë "hapa të mjaftueshëm" që do të çonin në përfundimin e Gjermanisë së përdorimit të lëndëve djegëse fosile deri në vitin 2030.