Në disa dyqane të zinxhirit të shitjes me pakicë Lidl, një njoftim i pazakontë është shfaqur për konsumatorët - se disa produkte të markës së tyre nuk do të jenë në dispozicion për një periudhë të caktuar kohore për shkak të pezullimit të importeve. Siç ka raportuar portali Agropres, shënime të tilla janë të pazakonta dhe rrallëherë shihen në zinxhirët e shitjes me pakicë në Serbi, transmeton Politika.rs. Lidl ka shpjeguar se bëhet fjalë për ndalim të importit të produkteve të caktuara nga Gjermania në Serbi.

– Për shkak të këtij ndalimi, importet e produkteve të mishit të viçit janë pezulluar aktualisht dhe përfshijnë produktet e qumështit, si dhe ato që përmbajnë gjurmë të këtyre përbërësve. Për këtë arsye, artikuj të caktuar nuk do të jenë të disponueshëm në dyqanet tona në periudhën e ardhshme, për të cilat ne i kemi njoftuar klientët përmes etiketave të çmimeve - tha Lidl për Agropress.

Ata treguan se kjo kompani gjermane po punon intensivisht për gjetjen e furnitorëve vendas dhe rajonalë për të kompensuar mungesën e këtyre produkteve. Megjithatë, numri i saktë i produkteve të prekura nga ndalimi i importit nuk është specifikuar. Siç është konfirmuar për "Politika" nga Ministria e Bujqësisë, bëhet fjalë për ndalim të importit të disa llojeve të qumështit dhe mishit në Serbi nga vendet ku ka prani të sëmundjeve të kafshëve Afta Epizootike. Në Gjermani, kjo sëmundje u raportua më 10 janar dhe nuk ishte vërejtur më parë për 35 vjet. Më 22 janar, Serbia ndaloi zyrtarisht importin dhe transportin e ngarkesave me origjinë nga vendet ku dyshohej ose konfirmohej sëmundja e Afta Epizootike.