Gjermania dha një numër rekord pasaportash për të huajt vitin e kaluar
Në Gjermani vitin e kaluar, më shumë se 168.000 të huaj morën pasaportë gjermane, që është numri më i lartë në 20 vitet e fundit.
Kjo është 28 për qind më shumë se një vit më parë, tha Enti Federal i Statistikave në Wiesbaden, duke theksuar se jo aq shumë banorë të rinj janë regjistruar në 20 vitet e fundit, transmeton Deutsche Welle.
Vitin e kaluar, 168.545 persona, 171 kombësi, morën nënshtetësinë gjermane dhe në këtë mënyrë ushtruan të drejtën për të marrë pasaportë gjermane.
Shumica e "gjermanëve të rinj" janë emigrantë nga Siria. Me një pjesëmarrje prej 29 për qind, 48.300 shtetas sirianë përbëjnë grupin më të madh të personave të natyralizuar gjatë vitit të kaluar.
Shumë prej tyre u larguan nga Siria në Gjermani gjatë luftës civile. Pas sirianëve janë ukrainasit, irakianët dhe turqit.
Ekspertët parashikojnë për vitin 2023 se numri i të ardhurve të rinj mund të pritet të vazhdojë të rritet, pjesërisht sepse partitë në pushtet SPD, të Gjelbrit dhe FDP duan të ndryshojnë rrënjësisht Ligjin e Shtetësisë.
Koalicioni qeverisës beson se Gjermania ka nevojë urgjente për emigracion të kualifikuar dhe dëshiron të lejojë njerëzit që tashmë jetojnë atje të integrohen dhe të marrin nënshtetësinë.
Në thelb, parashikohet një qëndrim minimal më i shkurtër për natyralizim - në vend të tetë viteve, ai duhet të jetë pesë vjet, dhe në rastin e "arritjeve të veçanta integruese" vetëm tre.
Përveç kësaj, aplikantët nuk duhet të detyrohen më të heqin dorë nga shtetësia e mëparshme për të marrë një shtetësi gjermane. Në parim, kjo do të nënkuptonte legalizimin e dyshtetësisë.
Rreth gjashtë milionë të huaj jetojnë në Gjermani dhe kanë qenë në atë vend për më shumë se tetë vjet.