Ministri i Jashtëm i Ukrainës, Dmitro Kuleba, do të vizitojë tre vende afrikane javën e ardhshme për të rritur mbështetjen për Kievin në luftën e tij kundër Rusisë, tha Ministria e Jashtme e Ukrainës.

Kuleba do të vizitojë Malavi, Zambia dhe Mauritius midis 4 dhe 8 gusht. Ky do të jetë turneu i katërt diplomatik i ministrit në Afrikë në dy vitet e fundit.

“Të gjitha takimet do të synojnë zhvillimin e marrëdhënieve dypalëshe, bazuar në respektin dhe interesat reciproke. Ndër temat kryesore do të jetë pjesëmarrja e shteteve afrikane në përpjekjet globale për të rivendosur një paqe të drejtë për Ukrainën dhe botën”, thuhet në njoftimin e ministrisë.

Disa vende afrikane morën pjesë në konferencën e paqes në Ukrainë të mbajtur në Zvicër në qershor. Shumica e tyre nuk ishin të gatshëm t'i bashkoheshin përpjekjeve perëndimore për të izoluar Rusinë, e cila është një furnizues i rëndësishëm i energjisë dhe mallrave.

Kuleba do të diskutojë gjithashtu dërgesat e grurit ukrainas në rajon dhe pjesëmarrjen e kompanive afrikane në rindërtimin e Ukrainës, shtoi ministria.